ਹੁਣ ਤੱਕ 2 ਸਿਆਸੀ ਪਾਰਟੀਆਂ ਵੱਲੋਂ ਦੋ ਵੱਡੇ ਗਾਇਕ ਚਿਹਰਿਆਂ ਨੂੰ ਲਿਆਦਾ ਗਿਆ ਚੋਣ ਮੈਦਾਨ ਵਿਚ ਜਦੋਂਕਿ ਬਾਕੀ ਪਾਰਟੀਆ ਵੀ ਉਮੀਦਵਾਰ ਲਈ ਸਿਆਸੀ ਲੀਡਰਾਂ ਨੂੰ ਛੱਡ ਗਾਇਕ ਜਾਂ ਅਦਾਕਾਰਾਂ ਦੀ ਭਾਲ ਵਿਚ

ਸੁਖਜਿੰਦਰ ਸਹੋਤਾ

ਫਰੀਦਕੋਟ 31 ਮਾਰਚ,
ਇਕ ਸਮਾਂ ਸੀ ਜਦੋਂ ਫਰੀਦਕੋਟ ਜਿਲ੍ਹੇ ਦੀ ਸਿਆਸਤ ਦੇ ਦੁਨੀਆ ਵਿਚ ਚਰਚੇ ਸਨ ਅਤੇ ਫਰੀਦਕੋਟ ਜਿਲ੍ਹੇ ਦੇ ਕਿਸੇ ਵੀ ਲੀਡਰ ਦੀ ਸਮੂਲੀਅਤ ਤੋਂ ਬਿਨਾਂ ਪੰਜਾਬ ਦੀ ਵਿਜਾਰਤ ਪੂਰੀ ਨਹੀਂ ਸੀ ਹੁੰਦੀ।

ਇਸ਼ਤਿਹਾਰ

ਫਰੀਦਕੋਟ ਜਿਲ੍ਹੇ ਦੇ ਤਿੰਨ ਨੇਤਾ ਮੁਖ ਮੰਤਰੀ ਬਣੇ ਇਕ ਉਪ ਮੁਖ ਮੰਤਰੀ ਬਣਿਆ, ਇਕ ਦੇਸ਼ ਦਾ ਰਾਸ਼ਟਰਪਤੀ ਬਣਿਆ, ਇਸ ਦੇ ਨਾਲ ਨਾਲ ਕੇਂਦਰੀ ਵਜਾਰਤ ਵਿਚ ਵੀ ਫਰੀਦਕੋਟ ਜਿਲ੍ਹੇ ਨੇ ਕਈਵਾਰ ਸਮੂਲੀਅਤ ਕੀਤੀ। ਪੰਜਾਬ ਦਾ ਸ਼ਾਇਦ ਹੀ ਕੋਈ ਹੋਰ ਅਜਿਹਾ ਜਿਲ੍ਹਾ ਹੋਵੇ ਜਿਥੋਂ ਦਾ ਕੋਈ ਸਿਆਸਤਦਾਨ ਰਾਸਟਰਪਤੀ ਅਤੇ 3-3 ਮੁੱਖ ਮੰਤਰੀ ਪੈਦਾ ਕਰਨ ਵਾਲਾ ਹੋਵੇ। ਇਹ ਉਹ ਸਮਾਂ ਸੀ ਜਦੋਂ ਸਿਆਸਤ ਨੂੰ ਲੋਕ ਸੇਵਾ ਮੰਨਿਆ ਜਾਂਦਾ ਸੀ ਪਰ ਪਿਛਲੇ ਕੁਝ ਇਕ ਦਹਾਕੇ ਤੋਂ ਸਿਆਸਤ ਵੀ ਇਕ ਕਾਰੋਬਾਰ ਬਣ ਕੇ ਰਹਿ ਗਈ ਜਿਸ ਦੇ ਚਲਦੇ ਸਿਅਸੀ ਨੇਤਾ ਵੀ ਬਦਲੇ ਅਤੇ ਉਹਨਾਂ ਦੇ ਕਿਰਦਾਰ ਵੀ ਬਦਲੇ। ਅਜਿਹੇ ਵਿਚ ਵੱਡੇ ਫੇਰ ਬਦਲ ਹੋਣਾਂ ਲਾਜਮੀਂ ਸੀ ਅਤੇ ਇਸੇ ਫੇਰ ਬਦਲ ਦੀ ਬਦੌਲਤ ਅੱਜ ਫਰੀਦਕੋਟ ਜਿਲ੍ਹਾ ਸਿਆਸਤ ਪੱਖੌਂ ਪੂਰੀ ਤਰਾਂ ਨਾ ਪਛੜ ਚੁੱਕਾ ਹੈ।

ਇਸ਼ਤਿਹਾਰ

ਇਥੋਂ ਦੇ ਸਿਆਸੀ ਨੇਤਾ ਲੋਕ ਸੇਵਾ ਨੂੰ ਭੁੱਲ ਆਪਣੇ ਨਿੱਜੀ ਸੁਆਰਥਾਂ ਨੂੰ ਪਹਿਲ ਦੇਣ ਲੱਗੇ ਹਨ ਜਿਸ ਦੀ ਤਾਜਾ ਮਿਸਾਲ ਪਿਛਲੇ ਕਰੀਬ ਇਕ ਦਾਹਕੇ ਤੋਂ ਚਲਦੀ ਆ ਰਹੀ ਸਿਆਸੀ ਉਥਲ ਪੁਥਲ ਤੋਂ ਸਹਿਜੇ ਹੀ ਮਿਲ ਜਾਂਦੀ ਹੈ।

ਹੁਣ ਤੱਕ ਫਰੀਦਕੋਟ ਜਿਲ੍ਹੇ ਤੋਂ ਕਿਹੜੇ ਕਿਹੜੇ ਕਿਹੜੇ ਨੇਤਾ ਰਹੇ ਉੱਚੇ ਅਹੁਦਿਆਂ ਤੇ ਬਿਰਾਜਮਾਨ?

ਫਰੀਦਕੋਟ ਜਿਲ੍ਹੇ ਨਾਲ ਸਬੰਧਿਤ ਕਾਂਗਰਸੀ ਨੇਤਾ ਗਿਆਨੀ ਜੈਲ ਸਿੰਘ ਭਾਰਤ ਦੇਸ ਦੇ 7ਵੇਂ ਰਾਸ਼ਟਰਪਤੀ ਰਹੇ।

ਗਿਆਨੀ ਜੈਲ ਸਿੰਘ 1972 ਤੋਂ 1977 ਤੱਕ ਪੰਜਾਬ ਦੇ ਮੁੱਖ ਮੰਤਰੀ ਰਹੇ।

ਪ੍ਰਕਾਸ ਸਿੰਘ ਬਾਦਲ 5 ਵਾਰ ਪੰਜਾਬ ਦੇ ਮੁੱਖ ਮੰਤਰੀ ਰਹੇ । ਉਹਨਾਂ 1970 ਤੋਂ 1971 ਤੱਕ, 1977 ਤੋਂ 1980 ਤੱਕ,
1997 ਤੋਂ 2002 ਤੱਕ, 2007 ਤੋਂ 2012 ਅਤੇ 2012 ਤੋਂ 2017 ਤੱਕ ਸੂਬੇ ਦੀ ਅਗਵਾਈ ਕੀਤੀ।

ਫਰੀਦਕੋਟ ਜਿਲ੍ਹੇ ਦੇ ਹੀ ਜੰਮਪਲ ਹਰਚਰਨ ਸਿੰਘ ਬਰਾੜ 1995 ਤੋਂ 1996 ਤੱਕ ਪੰਜਾਬ ਦੇ ਮੁੱਖ ਮੰਤਰੀ ਰਹੇ।

ਗੁਰਬਿੰਦਰ ਕੌਰ ਬਰਾੜ 1985 ਤੋਂ 1987 ਤੱਕ ਪੰਜਾਬ ਵਿਧਾਨ ਸਭਾ ਵਿਚ ਵਿਰੋਧੀ ਧਿਰ ਦੀ ਨੇਤਾ ਰਹੇ।

ਫਰੀਦਕੋਟ ਜਿਲ੍ਹੇ ਨਾਲ ਸਬੰਧਿਤ ਸੁਖਬੀਰ ਸਿੰਘ ਬਾਦਲ 2 ਵਾਰ ਸੂਬੇ ਦੇ ਉਪ ਮੁੱਖ ਮੰਤਰੀ ਰਹੇ। ਇਕ ਵਾਰ ਕੇਂਦਰੀ ਮੰਤਰੀ ਮੰਡਲ ਵਿਚ ਸ਼ਾਮਲ ਰਹੇ।

ਇਸ ਦੇ ਨਾਲ ਹੀ ਫਰੀਦਕੋਟ ਜਿਲ੍ਹੇ ਦੇ ਪ੍ਰਮੁੱਖ ਨੇਤਾਵਾਂ ਵਿਚ  ਜਸਵਿੰਦਰ ਸਿੰਘ ਬਰਾੜ (ਸੰਧਵਾਂ), ਜਸਵਿੰਦਰ ਸਿੰਘ ਬਰਾੜ ਮੁਕਸਤਰ , ਹਰਭਗਵਾਨ ਸਿੰਘ ਝੱਖੜ ਵਾਲਾ, ਭਾਈ ਸ਼ਮਿੰਦਰ ਸਿੰਘ, ਜਸਮੱਤ ਸਿੰਘ ਢਿਲੋਂ, ਲਾਲਾ ਭਗਵਾਨ ਦਾਸ, ਗੁਰਦੇਵ ਸਿੰਘ ਬਾਦਲ, ਜਗਮੀਤ ਸਿੰਘ ਬਰਾੜ, ਉਪਿੰਦਰ ਕੁਮਾਰ ਸ਼ਰਮਾਂ,ਆਦਿ ਦੇ ਨਾਮ ਅਹਿਮ ਹਨ ਜਿਨ੍ਹਾਂ ਦੀ ਸਿਆਸਤ ਦਾ ਵਿਰੋਧੀ ਵੀ ਲੋਹਾ ਮੰਨਦੇ ਸਨ।

ਕਰੀਬ ਪੰਜ ਸਾਲ ਪਹਿਲਾਂ ਫਰੀਦਕੋਟ ਵਿਚ ਹੋਈ ਲੋਕ ਸਭਾ ਚੋਣਾਂ ਵਿਚ ਹੀ ਇਹ ਸੰਕੇਤ ਮਿਲ ਗਏ ਸਨ ਕਿ ਫਰੀਦਕੋਟ ਦੇ ਸਿਅਸੀ ਲੀਡਰਾਂ ਦਾ ਸਿਅਸਤ ਵਿਚ ਹੁਣ ਉਹ ਰੁਤਬਾ ਨਹੀਂ ਰਿਹਾ ਜੋ ਕਦੀ ਗਿਆਨੀ ਜੈਲ ਸਿੰਘ, ਪ੍ਰਕਾਸ਼ ਸਿੰਘ ਬਾਦਲ ਅਤੇ ਹਰਚਰਨ ਸਿੰਘ ਬਰਾੜ ਹੋਣਾਂ ਵੇਲਾ ਹੁੰਦਾ ਸੀ।

ਇਸ਼ਤਿਹਾਰ

ਲਗਭਗ ਸਾਰੀਆਂ ਹੀ ਪ੍ਰਮੁੱਖ ਸਿਆਸੀ ਪਾਰਟੀਆਂ ਨੂੰ ਕੋਈ ਵੀ ਕਿਸੇ ਵੀ ਲੋਕਲ ਲੀਡਰ ਤੇ ਇਨਾਂ ਭਰੋਸਾ ਨਹੀਂ ਸੀ ਰਿਹਾ ਜਿਸ ਨੂੰ ਉਹ ਉਮੀਦਵਾਰ ਬਣਾ ਕੇ ਚੋਣ ਮੈਦਾਨ ਵਿਚ ਭੇਜ ਸਕਦੇ। ਇਸ ਦੇ ਉਲਟ ਜਿਸ ਪਾਰਟੀ ਨੇ ਲੋਕਲ ਲੀਡਰ ਅਤੇ ਤਤਕਾਲੀ ਮੈਂਬਰ ਪਾਰਲੀਮੈਂਟ ਤੇ ਭਰੋਸਾ ਕੀਤਾ ਉਹ ਪਾਰਟੀ ਦੇ ਭਰੋਸੇ ਤੇ ਖਰਾ ਨਾਂ ਉਤਰ ਸਕਿਆ ਅਤੇ ਬਾਹਰੋਂ ਲਿਆਦੇ ਗਏ ਇਕ ਗਾਇਕ ਨੂੰ ਲੋਕਾਂ ਨੇ ਜਿਤਵਾ ਕੇ ਲੋਕ ਸਭਾ ਭੇਜਿਆ।
ਇਸਵਾਰ ਵੀ ਲੋਕ ਸਭਾ ਚੋਣਾਂ ਦਾ ਐਲਾਨ ਹੋ ਚੁੱਕਿਆ ਹੈ, ਅਤੇ ਦੋ ਸਿਆਸੀ ਪਾਰਟੀਆਂ ਨੇ ਆਪਣੇ ਉਮੀਦਵਾਰਾਂ ਦਾ ਐਲਾਨ ਵੀ ਕਰ ਦਿੱਤਾ। ਇਸਵਾਰ ਜਿਹੜੇ ਦੋ ਉਮੀਦਵਾਰ ਦੋ ਵੱਖ ਵੱਖ ਸਿਆਸੀ ਪਾਰਟੀਆ ਵੱਲੋਂ ਚੋਣ ਮੈਦਾਨ ਵਿਚ ਉਤਾਰੇ ਗਏ ਹਨ ਉਨਾਂ ਦਾ ਫਰੀਦਕੋਟ ਅਤੇ ਸਿਆਸਤ ਨਾਲ ਕੋਈ ਦੂਰ ਦਾ ਵੀ ਵਾਸਤਾ ਨਹੀਂ ਹੈ। ਇਕ ਆਪਣੇ ਦੋਰ ਦਾ ਵੱਡਾ ਗਾਇਕ ਹੈ ਅਤੇ ਇਕ ਇਹਨੀਂ ਦਿਨੀ ਕਾਮੇਡੀ ਫਿਲਮਾਂ ਵਿਚ ਆਪਣੀ ਅਦਾਕਾਰੀ ਅਤੇ ਆਪਣੀ ਗਾਇਕੀ ਸਦਕਾ ਲੋਕਾਂ ਵਿਚ ਕਾਫੀ ਹਰਮਨ ਪਿਆਰਾ ਹੈ।

ਇਸ਼ਤਿਹਾਰ

ਦੋਹੇਂ ਪਾਰਟੀਆਂ ਆਪਣੇ ਉਮੀਦਵਾਰਾਂ ਦੀ ਹਰਮਨਪਿਆਰਤਾ ਦੇ ਸਿਰ ਤੇ ਚੋਣਾਂ ਜਿੱਤਣ ਦਾ ਦਾਅਵਾ ਕਰ ਰਹੀਆ ਹਨ।ਜਿਕਰਯੋਗ ਹੈ ਕਿ ਇਹ ਦੋਹੇਂ ਪਾਰਟੀਆ ਹੀ ਪੰਜਾਬ ਲਈ ਨਵੀਆਂ ਹਨ ਇਕ ਨੇ ਕਰੀਬ 10 ਸਾਲ ਪਹਿਲਾਂ ਪੰਜਾਬ ਦੀ ਸਿਆਸਤ ਵਿਚ ਪੈਰ ਧਰਿਆ ਸੀ ਅਤੇ ਦੂਸਰੀ ਨੇ ਪੰਜਾਬ ਵਿਚ ਪਹਿਲੀਵਾਰ ਇਕੱਲਿਆ ਚੋਣ ਲੜਨ ਦਾ ਫੈਸਲਾ ਕੀਤਾ ਹੈ।
ਇਸ ਦੇ ਨਾਲ ਹੀ ਬਾਕੀ ਬਚੀਆਂ ਦੋ ਰਿਵਾਇਤੀ ਪਾਰਟੀਆਂ ਜਿੰਨਾ ਵਿਚ ਇਕ ਖੇਤਰੀ ਪਾਰਟੀ ਹੈ ਅਤੇ ਇਕ ਨੈਸਨਲ ਪਾਰਟੀ ਹੈ, ਇਹਨਾਂ ਵੱਲੋਂ ਵੀ ਇਸਵਾਰ ਰਿਵਾਇਤੀ ਅਤੇ ਲੋਕਲ ਨੇਤਾਵਾਂ ਨੂੰ ਛੱਡ ਚਰਚਿਤ ਚੇਹਰਿਆ ਨੂੰ ਉਮੀਦਵਾਰ ਬਣਾਏ ਜਾਣ ਦੀ ਸੰਭਾਵਨਾਂ ਹੈ। ਇਹ ਵੀ ਪਤਾ ਚੱਲਿਆ ਕਿ ਦੋਹਾਂ ਪਾਰਟੀਆ ਵੱਲੋਂ ਭਾਲ ਕੀਤੀ ਜਾ ਰਹੀ ਹੈ ਕਿ ਕੋਈ ਸੈਲੀਬ੍ਰੇਟੀ ਚਿਹਰਾ ਚੋਣ ਲੜਨ ਲਈ ਤਿਆਰ ਹੋ ਜਾਵੇ।
ਕੁਝ ਵੀ ਹੋਵੇ ਇਹ ਫਰੀਦਕੋਟ ਜਿਲ੍ਹੇ ਲਈ ਇਕ ਕਾਲੇ ਅਧਿਆਏ ਤੋਂ ਸਿਵਾਏ ਕੁਝ ਵੀ ਨਹੀਂ ਹੈ। ਜਿਸ ਜਿਲ੍ਹੇ ਦੀ ਸਿਆਸਤ ਦਾ ਲੋਹਾ ਪੂਰੀ ਦੁਨੀਆਂ ਮੰਨਦੀ ਸੀ ਅੱਜ ਉਸ ਜਿਲਹੇ ਅੰਦਰ ਇਕ ਵੀ ਨੇਤਾ ਅਜਿਹਾ ਨਹੀਂ ਰਿਹਾ ਜਿਸ ਤੇ ਕੋਈ ਵੀ ਸਿਆਸੀ ਪਾਰਟੀ ਭਰੋਸਾ ਕਰ ਸਕੇ ਅਤੇ ਉਸ ਨੂੰ ਚੋਣ ਮੈਦਾਨ ਵਿਚ ਉਤਾਰ ਸਕੇ।ਇਕ ਹਿਸਾਬ ਦੇ ਨਾਲ ਪੰਜਾਬ ਦੀ ਸਿਆਸਤ ਵਿਚ ਇਕ ਤਰਾਂ ਦੇ ਨਾਲ ਫਰੀਦਕੋਟ ਜਿਲ੍ਹੇ ਦਾ ਸਿਆਸੀ ਕਤਲ ਹੋ ਚੁੱਕਿਆ, ਜਿਸ ਤੇ ਫਰੀਦਕੋਟੀਏ ਤੜੀਆਂ ਵਜਾ ਰਹੇ ਹਨ।